Nog regsaksie teen De Beers Fuel

Verdere regsoptrede teen die omstrede biodieselonderneming De Beers Fuel en ander betrokkenes word beoog nadat 'n dringende aansoek om die maatskappy te likwideer in die Pretoriase Hooggeregshof van die hand gewys is.

Van die aansoekers het vir 'n ondersoek gevra om vas te stel wat van franchise- en beleggingsgeld geword het wat in 'n trustrekening betaal is. Meer as R20 miljoen is na bewering ter sprake nadat beleggers gelok is met die belofte dat biodiesel uit alge vervaardig sou word.

Die Amerikaanse maatskappy wat die tegnologie sou verskaf, GreenFuel Technologies, het vroeër sy lisensie aan De Beers opgeskort. De Beers Fuel het geen verbintenis met die diamantmaatskappy De Beers nie.

Mnr. Martin Hood, prokureur vir ván die aansoekers, sê mnr. Hendy Scoonbee, 'n voormalige raadgewer vir De Beers, en mnr. Howard Woolf, 'n prokureur by wie na bewering trustgeld inbetaal is, sal nou by die saak betrek word. 'n Afsonderlike aksie is ook begin teen Bio Diesel Refinery Holdings wat vir die bemarking van franchises verantwoordelik was en waarby Scoonbee betrokke was.

Belanghebbendes in die biobrandstofbedryf het hul teleurstelling uitgespreek oor die omstredenheid rondom De Beers Fuel wat op Mookgopong (Naboomspruit) begin is. Dr. John Purchase, hoofbestuurder van Graan SA, sê Graan SA en die Suider-Afrikaanse Biobrandstofvereniging (Saba) wil graag 'n biobrandstofbedryf met geloofwaardigheid en integriteit in Suid-Afrika sien en werk hard om dit só te vestig. "As daar enige kriminele optrede in die bedryf bewys word, moet die gereg sy gang loop," het hy gesê.

Mnr. Fanie Brink, besturende direkteur van Biofuels Industry Development, sê verdagte skemas kom in enige besigheidsomgewing voor. Die biobrandstofbedryf behoort nie daardeur benadeel te word nie. Dit moet ook nie twyfel saai oor die voordele van biodiesel of selfs biodiesel uit alge nie.

"Die alge-tegnologie is nog nie ver genoeg gevorder vir kommersiële gebruik nie, maar dit kan vorentoe nog 'n ongelooflike bron van olie met hoë potensiaal vir biobrandstof word." Hy sê die bedryf is nog nuut in Suid-Afrika en mense wat hulle daarin wil begeef, moet hulle van die feite vergewis voor hulle halsoorkop betrokke raak.

19 Julie 2007