Nuwe LBK-baas is 'baie opgewonde'

Die nuwe uitvoerende direkteur van die Landboubesigheidskamer (LBK) is mnr. Tobias Doyer, voorheen die bestuurder: strategie en kapasiteitsontwikkeling van die LBK. Hy kom in die plek van dr. Johan van Rooyen, wat 'n pos as hoof uitvoerende beampte van die SA Wyn- en Brandewynmaatskappy (SAWB) aanvaar het.

Mnr. Doyer was sedert 1995 'n dosent in landbou-ekonomie aan die Universiteit van Pretoria. Sy spesialiteitsgebiede was voorsieningskettingbestuur, landboubemarking en landboubestuur.

Hy sê hy is "baie opgewonde" oor die nuwe uitdaging en hy gaan hom nou heeltyds toespits op sy nuwe taak. "Die LBK het nou sy eie identiteit en sal voortaan net sterk groei en baie bydra tot die Suid-Afrikaanse ekonomie," het hy gesê.

"Die LBK is onlosmaaklik gebind aan die georganiseerde landbou en die interafhanklikheid tussen die twee is 'n gegewe. Soos wat goeie landboubesighede van suksesvolle landbou afhanklik is, het goeie boere ook goeie landboubesighede nodig."

Mnr. Doyer sê Suid-Afrika se ekonomie is in 'n groot mate op die landbou gegrond en hy glo die LBK kan die enjin vir groei binne die land en in Afrika word.

Dr. Van Rooyen, wat ook professor in AgriBesigheidsbestuur van die ABSA-leerstoel aan die Universiteit van Pretoria was, het op 1 Januarie diens in sy nuwe pos aanvaar.

17 Januarie 2003