Nuwe wolseisoen l

Die nuwe wolseisoen skop Woensdag af wanneer sowat 12 000 bale in Port Elizabeth per veiling aangebied sal word.

Die seisoen open in 'n klimaat van swakker ekonomiese groei wêreldwyd en onsekerheid oor die uitwerking wat dit op die verbruikersvraag na kleding sal hê. In Australië, waar die mark reeds 'n aanvang geneem het, het pryse aanvanklik teruggesak, maar verlede week verstewig, hoofsaaklik as gevolg van 'n swakker Australiese geldeenheid.

Ontleders meen die skerp wêreldwye daling in kleedwolproduksie oor die afgelope seisoen of twee kan as teenwig vir die verswakkende ekonomiese klimaat dien. Die wêreldproduksie van kleedwol sal na raming dié seisoen met 7% daal.

Suid-Afrika was verlede seisoen die enigste van die vier belangrikste uitvoerlande van kleedwol waar produksie danksy gunstige klimaatstoestande met 3,6% tot sowat 48,6 miljoen kg gestyg het.

In ander drie lande, Australië, Uruguay en Argentinië, het produksie afgeneem en sal dit na verwagting dié seisoen verder daal.

Australië, die wêreld se grootste produsent van kleedwol, se produksie het die afgelope seisoen met sowat 12% teenoor die vorige seisoen gedaal en sal dié seisoen na verwagting met 'n verdere 7% tot 385 miljoen kg daal. Dit is die laagste vlak in 60 jaar.

Dié dalings word hoofsaaklik toegeskryf aan die voortgesette droogte in sekere wolproduksiestreke, onder meer Oos-Australië en Tasmanië, en die hoë graanpryse wat baie wolboere aangespoor het om hul skaapkuddes te verminder en meer graan aan te plant.

In Suid-Amerika het skaapgetalle ook afgeneem, hoofsaaklik as gevolg van swak klimaatstoestande. Patagonië, die belangrikste produksiestreek vir Merinowol in Argentinië, gaan geruime tyd reeds onder droogte gebuk, wat produksie na verwagting met 8% sal laat daal.

In Uruguay lyk die toestande nie veel beter nie en sal dié land se produksie na verwagting met 5% daal.

Die wisselkoers sal weer eens 'n groot invloed op die bepaling van prysvlakke uitoefen.

18 Augustus 2008