Omnia lewer stewige resultate

Omnia se landbou-afdeling het ’n stewige aandeel in die indrukwekkende resultate wat dié maatskappy bekend gemaak het.

Dié genoteerde chemiese maatskappy se wins vir die jaar wat op 31 Maart 2011 geëindig het, het met 678% toegeneem tot R451 miljoen. Sy winsmarge het bykans verdubbel vanaf 3,2% tot 7,3%.

Kunsmisverkope hoog
Kunsmisverkope was verantwoordelik vir 45% van dié spogresultate.

Mnr. Rod Humphris, uitvoerende direkteur van Omnia, sê die internasionale vraag na myn- en landboukommoditeite, tesame met ’n sterk rand en lae aktiwiteitsvlakke in die Suid-Afrikaanse verwerkingsektor, was die grootste dryfvere vir vanjaar se resultate.

Wat sy landbou-afdeling betref, was Omnia se bedryfswins 467% hoër (R312 miljoen) as in die vorige finansiële jaar toe dié afdeling ’n verlies van R85 miljoen gely het. Dié verlies wat grootliks te wyte aan R350 miljoen se voorraad wat daardie jaar afgeskryf moes word.

Sterk groei
Die afgelope jaar het Omnia se landbou-afdeling se omset met 10% gegroei tot R3,7 miljard (2009/’10: R3,3 miljard), wat ’n winsmarge van 8,5% tot gevolg gehad het. Humphris sê Omnia het die afgelope jaar gekapitaliseer op Sasol Nitro en Yara se grootlikse uittrede uit die kunsmismark.

Daar is weer eens geen dividend aan aandeelhouers verklaar nie. Dít is as gevolg van ’n besluit om dié geld terug te hou om die ontwikkeling van ’n nuwe salpetersuuraanleg te finansier. Dié aanleg behoort volgende jaar in die eerste kwartaal voltooi te wees.

Die mededingingsaak teen die kunsmismaatskappye Omnia en Yara het onlangs tot 'n einde gekom. Lees die storie hier.

29 Junie 2011