Ontevredenheid oor Afrika-grondtranksies

Landbougrond in Afrika word by die dag gewilder met Indiese, Chinese en Amerikaanse maatskappye wat grond op die vasteland aanskaf.

Volgens ’n studie van die Oakland Institute in die VSA, het beleggers in 2009 ’n stuk grond so groot soos Frankryk gekoop of gehuur in Afrika suid van die Sahara. In dié proses is boere in lande, soos Ethiopië, Tanzanië, Suid-Soedan, Mali en Mosambiek hul grond kwyt.

Kenners meen egter dat grond van eienaars ontneem word sonder die nodige kontrakte. ’n Gebrek aan behoorlike regulasies baan die weg vir dié maatskappye om besit vrugbare landbougrond te kry.

Volgens ’n berig op inamibia.com beweer die beleggers dat hulle deur die verbouing van voedsel op die grond kan help om voedseltekorte in Afrika teen te werk en dat boere wat deur die maatskappye in diens geneem word, meer verdien as wat hulle andersins sou.

Inwoners van die lande vrees egter dat die maatskaplike invloed van die oorname van grond in die lande op lang termyn eerder tot grootskaalse armoede en onteiening sal lei.

Bron: inamibia.com

31 Oktober 2011