Oos-Kaap baklei vir droogtehulp

Droogte. Foto: Earthclinic.com

Agri Oos-Kaap het sy provinsiale departement van landbou versoek om voor die einde van die huidige geldjaar die R26,9 miljoen wat vir droogteramphulp beskikbaar gemaak is, uit te betaal. Mnr. Cerneels Pietersen, voorsitter, en een van sy raadslede het met die departement vergader omdat die uitbetaling van die fondse glo sloer.

Die Regering het in September verlede jaar reeds die fondse aan die provinsiale departement van landbou beskikbaar gestel ná ‘n groot deel van die provinsie as ‘n rampgebied verklaar is.

Pietersen sê daar is ernstig beswaar gemaak teen die werkswyse van die departement. Hy sê daar is twee klerke aangestel om al die aansoeke wat vanaf die boere ontvang word, te verwerk. “Daar is ‘n magdom aansoeke ontvang. Uit die Amatola-omgewing naby Oos-Londen het die departement derduisende aansoeke ontvang.”

Diensverskaffers moes ook geakkrediteer word sodat hulle goedere aan boere wat wel later fondse ontvang, mag verkoop. Pietersen sê die voorkoming van moontlike korrupsie en misdaad wat die fondse betref, het ‘n enorme hoeveelheid rompslomp vir die departement tot gevolg gehad.

Satelliete nie meer enigste metode
Volgens Pietersen is die departement ook oorreed om sy metodes om vas te stel watter boere hulp moet ontvang, te verander. Hy sê die departement wou net van satellietfoto’s gebruik maak, maar dit sou nie akkuraat wees nie aangesien baie plantegroei in die omgewing immergroen is en sekere dele dus nie droog lyk nie.

“Die weerkantoor het ook aan ons gesê dat hulle satelliete in klowe en op berge nie so akkuraat is nie”. Pietersen sê derhalwe het die departement instem dat besluitnemers elke gebied moet besoek en sodoende vas stel wie fondse moet ontvang. “Daar is baie boere wat ook al gevra het om sogenaamd “ontlys” te word, aangesien daar reeds in sommige dele van die Ukhahlanpa munisipale distrik reën geval het”. 

Nog fondse
Agri Oos-Kaap het ook van die departement versoek om te verseker dat elke boer wat vir droogtehulp kwalifiseer oor vier weke hulle dokumentasie om voer aan te koop in hulle hande sal hê. “Ons wil hê dié bedrag moet voor die einde van die huidige geldjaar uitbetaal wees sodat die departement vir nog fondse kan aansoek doen. Daar is aanvanklik vir R121 miljoen gevra, maar slegs die R26,9 miljoen is aan ons toegestaan.

Agri Oos-Kaap het ook van sy administratiewe personeel beskikbaar gestel om die departement by te staan. Die Oos-Kaap word die afgelope drie jaar al deur droogte geteister.

14 Januarie 2010