Oos-Kaap kry droogtehulp van R20m.

Droogtegeteisterde boere in die Oos-Kaap kan moontlik eersdaags voordeel trek uit droogtehulp van R20 miljoen.

Diegene wat om droogtehulp aansoek gedoen het en aan die nodige vereistes voldoen, behoort binne ’n maand voordeel te trek uit die R20 miljoen wat die Regering vir dié doel beskikbaar gaan stel.

Mnr. Cerneels Pietersen, voorsitter van Agri Oos-Kaap, sê op ’n vergadering met amptenare op Bisho is verduidelik dat die vertraging in uitbetaling te wyte is aan die duisende aansoeke wat ontvang is en eers verwerk moes word.

“Ons het die onderneming gekry dat boere wat aan die kriteria vir droogtehulp voldoen, binne die volgende maand die nodige dokumente sal kry om aansoek om uitbetaling te doen. Die hulp is nou ook uitgebrei na boere in die immergroen-deel van die provinsie, terwyl die distrik Ukhahlamba in die noordoostelike deel van die provinsie nou van die lys verwyder is.”

Pietersen sê daar word nog gewag op die beskikbaarstelling van ’n verdere R6,9 miljoen waarom ook reeds aansoek gedoen is. Agri Oos-Kaap het die provinsiale regering versoek om nou al die nasionale Regering te nader om verdere hulp in die nuwe boekjaar.

26 Januarie 2010