Optimisme stu trekkerverkope

Trekkerverkope van 704 eenhede is byna 65% hoër as die 427 eenhede wat verlede Julie verkoop is, sê mnr. Lane Reynolds, voorsitter van die SA Landboumasjinerie-assosiasie.

Boonop is trekkerverkope byna 35% hoër as wat dit in die ooreenstemmende sewe maande van verlede jaar was.

Stroperverkope van 20 eenhede is meer as dubbel die verkope van nege eenhede wat verlede Julie verkoop is. Vergeleke met die ooreenstemmende eerste sewe maande van verlede jaar, is stroperverkope van 165 eenhede vir dié jaar byna 19% meer.

Reynolds sê sedert November verlede jaar is trekkerverkope per ooreenstemmende maand tot dusver hoër as verkope vir dieselfde maand die vorige jaar. Dit weerspieël volgehoue optimisme in die mark vir landboumasjinerie. Vooruitsigte vir kommoditeitspryse, veral die mielieprys, lyk goed.

Volgens aanduidings het die plaaslike graanvoorraad aansienlik afgeneem, veral weens hoër uitvoere. Vooruitsigte vir die komende koring-oes lyk ook goed. Dit is nou makliker en vinniger as ’n jaar gelede om krediet te vergroot by banke, en pryse vir toerusting bly baie mededingend weens die volgehoue sterk rand.

Ramings binne die bedryf vir trekkerverkope, vir die kalenderjaar 2011, is weer dié maand opwaarts aangepas tot tussen 6 400 en 6 700 eenhede, ongeveer 25% tot 30% hoër as verkope vir 2010.

4 Augustus 2011