Os du Randt in stryd oor 'Osbloed'

'n Stryd woed rondom die handelsnaam "Osbloed".

‘n Groot stryd woed om die naam “Osbloed” tussen ‘n wynmaker van Somerset-Wes en Os du Randt, Springbok-rugbyspeler.

Aan die een kant is ds. Bertus van Niekerk, ’n ontstoke waenhuis-wynmaker van Somerset- Wes, en aan die ander kant een van Suid-Afrika se grootste rugbylegendes, Os du Randt.

Bewyse
Van Niekerk het aan Landbouweekblad bewys dat hy reeds op 1 Desember verlede jaar die naam by die Suid-Afrikaanse Wynbedryf- en Inligtingstelsels (Sawis) geregistreer het vir sy Shiraz/Cabernet Sauvignon-versnit.

Hy het ook op 30 Mei vanjaar by die elektroniese diens vir die registrasie van intellektuele eiendom (CIPC) aansoek gedoen om die naam te registreer. Volgens dokumente wat Van Niekerk verskaf het, het Ten90 Wines (die maatskappy wat Du Randt en kie verteenwoordig) eers drie dae later daarom aansoek gedoen.

Van Niekerk het ook kommunikasie met kleinhandelaars gestuur om te bewys dat hy reeds verlede jaar met hulle onderhandel het om sy wyn op Stellenbosse winkelrakke te kry.

Generiese naam?
Een van Du Randt se vennote, mnr. Eion (Klaas) Du Toit het egter tydens die bekendstelling van die wyn aan verskeie lede van die media gesê hy het die rugbyspeler op ’n braai in die Vrystaat ontmoet. Die volgende oggend het die idee om ’n rooiwyn onder die naam Osbloed te bemark, hom getref.

“Ons het verskeie regsmenings verkry wat aan ons gesê het ‘osbloed’ is ’n generiese naam, soos rooibostee, so enigeen kan dit gebruik.” Voorts het hulle reeds twee briewe aan Van Niekerk geskryf waarin hulle hom vra om bewys te lewer van sy aantygings, maar het geen reaksie gekry nie.

Van Niekerk is bekommerd oor die uitwerking wat hierdie “kaping” van sy handelsmerk op die res van die wynbedryf kan hê. “In die wynbedryf is min handelsmerke geregistreer.

’n Wynplaas sal byvoorbeeld die plaas se naam registreer, maar nie elke etiket op die plaas nie omdat registrasie ’n lang en duur proses is. Indien Os du Randt toegelaat word om my handelsmerk te kaap, sal dit ’n pandemonium in die wynbedryf veroorsaak.

12 Augustus 2011