Parmalat gaan nie sukkelende boere help

Sukkelende melkboere in die Overberg – wat om oorlewing veg – is met leë hande weggestuur toe hulle by Parmalat om hulp aangeklop het.

In ‘n nuusverklaring sê mnr. Johan du Toit, woordvoerder van die Overberg Suiwel-Aksiegroep (OSAG) ‘n vergadering is onlangs met Parmalat gehou om die volhoubaarheid van primêre suiwelboerdery in die Overberg te bespreek.

(Dié groep het op 4 Julie bekend gemaak dat 21 melkboere in die Overberg-streek die bedryf die laaste ses maande verlaat het, wat tot 105 plaaswerkers werkloos kan laat.)

'Genoeg vir sommige produsente'
Volgens Du Toit het Parmalat op die vergadering benadruk dat die Overberg strategies ‘n belangrike melkproduserende gebied vir sy fabriek op Bonnievale is, maar dat dit nie binne sy vermoë is om die streek se produsente in geheel te vergoed volgens die aangevraagde verhoging van 30c per liter nie. Parmalat het in die gesprek aangedui dat hy sy prysverhoging van 10c per liter op 1 Augustus 2011 “as genoegsaam vir sommige produsente” beskou en dat verdere prysverhogings tot en met Maart 2012 nie in hierdie stadium moontlik is nie.

‘n Werkbare oplossing tussen die aksiegroep en Parmalat kon nie gevind word om die volhoubaarheid van suiwelproduksie te verseker nie. Die groep het die risiko uitgewys dat indien daar nie binne die volgende twee maande ‘n dramatiese verandering kom in terme van prys nie, meer primêre suiwelproduksie-eenhede wat melk aan die Bonnievale-fabriek lewer, uit die bedryf sal tree.

Du Toit sê die OSAG het ná die vergadering besluit om voort te gaan met ander strategiese aksies om die volhoubaarheid van primêre suiwelboerdery in die Overberg te verseker. Die groep besef dat huidige modelle van die verdeling van die verbruikersrand nie volhoubare melkproduksie ondersteun nie.

6 Augustus 2011