Perde-reeks in LW

Die vermoë van die mens om die perd se krag en sterkte tot sy eie voordeel te gebruik, het te veel kere tot wrede uitbuiting en selfs mishandeling gelei — nie noodwendig ''fisiese mishandeling'' nie, maar verwaarlosing vanweë onkunde.

Hierdie ''verwaarlosing'' kan verhoed word as mense die nodige kennis het oor hoe om na hul perde om te sien. Landbouweekblad gaan hiermee help met artikels waarin talle van hierdie probleme en ander bestuursaspekte behandel sal word.

Die eerste artikel oor faktore wat by die koop van 'n perd in ag geneem moet word, verskyn reeds in die uitgawe van 14 Mei. Die artikels word deur Landé Cawood saamgestel. Met haar praktiese kennis wil sy onder meer aan boere en werkers wat perde elke dag op die plaas gebruik, wys hoeveel meer werk uit 'n perd gekry kan word as hulle mooi opgepas en reg gehanteer word.