Petrol, kunsmis spring staking vry

Duisende lede van die Chemiese, Energie-, Papier-, Druk- en Hout-vakbond (Ceppwawu), die grootste van die vier vakbonde wat by loononderhandelinge in dié sektor betrokke is, het verlede week in ander chemiese bedrywe begin staak.

Hulle eis ‘n 10 %-loonverhoging, het mnr Cedric Maleleke, Ceppwawu-woordvoerder, by navraag gesê.

Die staking raak egter nie die petroleumbedryf nie, omdat dié werkgewers kort voor die beoogde staking ‘n nuwe aanbod oor loonverhogings vir die volgende twee jaar gemaak het. Dit sluit ‘n 9,5 %-verhoging vir dié jaar in.

“Dit lyk of ons lede daarmee tevrede is,” het Maleleke aan Landbouweekblad gesê. Werkers staak wel in die bedrywe vir industriële chemiese middels, farmaseutiese middels, pulp en papier, het hy gesê.

Mnr. Koos Engelbrecht, van die kunsmisbedryf se werkgewersvereniging, het bevestig dat daar ook nog geen stakings by kunsmisaanlegte is nie.

Die vakbond Solidariteit, wat ook aan die loononderhandelinge in die nasionale bedingingsraad vir die chemiese bedryf deelneem, het vroeër in ‘n verklaring gewaarsku dat hy dit sal oorweeg om ‘n 48-uur kennisgewing vir ‘n staking uit te reik as sy lede besluit om nie werkgewers se aanbod van 8 % te aanvaar nie.

Sasol, Foskor en Omnia is onder die groot werkgewers wat by die onderhandelings betrokke is, het Solidariteit gesê.

23 Julie 2009