Pioneer betaal geen dividend

Pioneer Foods se kragmeting met die Mededingingskommissie en markomstandighede het dié genoteerde maatskappy se finansiële state só gekarnuffel dat geen dividend vanjaar verklaar is nie.

‘n Dividend van R1,25 per aandeel is in die vorige finansiële jaar, geëindig 30 September, uitgereik.

Volgehoue deflasionêre druk is as rede aangevoer vir die daling van 3% in inkomste van R16,284 miljard (2009) tot R15,731 miljard (2010). Die maatskappy se netto wins het gestyg vanaf R4,551 miljard (2009) tot op R5,01 miljard (2010). Bedryfswins het gedaal vanaf R1,092 miljard (2009) tot R742,7 miljoen (2010).

Pioneer se veelvuldige mededingingsake het hom die afgelope jaar R654 miljoen gekos. Dit sluit die R196 miljoen boete vir sy betrokkenheid by ‘n broodkartel en R458 miljoen opgelope koste vir die skikking met die Mededingingskommissie vir alle ander sake wat tans teen die maatskappy ondersoek is. Dié boetes het veroorsaak dat die wesensverdienste per aandeel met 62% daal tot R236 miljoen (2009: R620,9 miljoen).

Die uitstaande boetes sal in die huidige finansiële jaar vereffen word.

Indien die boete- en skikkingskoste buite rekening gelaat sou word, sou die bedryfwins vir die 2010 finansiële jaar op R1,407 miljard te staan gekom het. Dit sou ‘n verbetering van 21% op die vorige jaar se syfer gewees het.

Die resultate is gunstig ontvang. Pioneer se aandeelprys het Maandag, 6 Desember, op R49,25 per aandeel gesluit en net ná die aankondiging die Dinsdag het die prys gestyg tot op R50,80 per aandeel. Teen Woensdagoggend het dié syfer op R52 gestaan.

7 Desember 2010