Plaasaanvallers skree ‘viva, Malema’

Vier gewapende rowers het die afgelope naweek tydens ‘n plaasaanval op Cullinan glo geskree “viva, Malema” en “julle wit skuim”.

Twee ander plase in die omgewing is glo ook geteiken, sê die TLU SA. Mnr. Louis Meintjes, ondervoorsitter van die organisasie, sê die eerste twee aanvalle is deur buurtwagpatrollies afgeweer.

“Tydens die eerste insident het die aanvallers drade geknip en ons patrollies het hulle opgespoor en verjaag. ‘n Halfuur daarna is die patrollies van nog ‘n aanval in kennis gestel, en die aanvallers daar is ook verjaag. Die eienaars van die plaas waar die derde aanval plaasgevind het, het nie ‘n radio gehad waarmee hulle ons kon kontak nie, maar hulle het nou een. Ons vermoed dit was dieselfde aanvallers wat by al drie die aanvalle betrokke was. Die Polisie ondersoek ook dié moontlikheid,” sê Meintjes.

Lees ook:

Plaasmoord: Honderde betoog

Jeugliga "weet niks"
Intussen het mnr. Paseka Letsatsi, ‘n woordvoerder van die ANC Jeugliga, aan landbou.com gesê sy organisasie wil nie kommentaar op die voorval lewer nie. “We have no comment. We don’t know anything about that.”

“Sterf wit man! Viva, Malema!”
Luidens ‘n berig van Nuus24.com is die woorde “sterf wit man” en “viva, Malema” geskree gedurende die plaasaanval in Bynespoort vroeg Saterdagoggend. Die rowers het glo ‘n venster in die sitkamer gebreek om toegang tot die huis te verkry.

Die eienaar, 39-jarige mnr. Leon Koekemoer, ’n kaptein en instrukteur in die Herstigte Kommandokorps, het na bewering een van die rowers met ‘n byl – wat hy in die kamer hou – gekap terwyl dié met sy vrou gestoei het. Sy 37-jarige vrou, Annelie, het glo hul kamerdeur probeer toedruk toe die een aanvaller die kamer wou binnekom. Die verdagte het die deur oopgedruk en met haar begin stoei.

Die verdagte het toe op die vlug geslaan. Die loseerder wat by die Koekemoers tuisgaan het twee skote op ‘n tweede aanvaller – wat in sy kamer ingebreek het – afgevuur, waarna die man dood in die gang neergeval het. Die ander twee aanvallers het toe ook op die vlug geslaan.

Bevestiging dat uitsprake wel ‘n uitwerking het
Meintjes sê dié aanval bevestig dat die beweerde uitsprake deur mnr. Julius Malema, voorsitter van die ANC Jeugliga, en die liedere wat hy sing ‘n uitwerking op die samelewing en plaasaanvalle het.

Hy raai boere aan om hulle paraatheid op te skerp en by hulle plaaslike buurtwagprogramme betrokke te raak sodat hulle hulleself kan beveilig. “Na ons mening kan ons met sekerheid sê dat die revolusie nog nie klaar is nie,” sê Meintjes.

12 April 2010