Plaasaanvallers vry, borg in ET-saak

Borg is toegestaan aan een van die verdagtes wat van die moord op mnr. Eugene Terre’Blanche, die voormalige leier van die Afrikaner Weerstand Beweging (AWB), verdink word. Luidens ‘n berig op Jacaranda FM is borg aan die 28 jarige Chris Malangu toegestaan, die bedrag is egter nog nie vasgestel nie.

Mnr Mthunzi Mhaga, ‘n woordvoerder vir die Nasionale Vervolgingsgesag, sê hulle respekteer die hof se bevinding, maar hulle oorweeg om dit moontlik te appèlleer.

Terre’Blanche is op 3 April dood nadat hy in sy plaashuis buite Ventersdorp 28 houe met ‘n ysterpyp en panga toegedien is.

Plaasaanvallers vry?
Ses vermeende plaasaanvallers is intussen glo weens swak-polisiewerk op Hartswater vrygelaat.

Luidens ‘n nuusverklaring het die TLU SA ‘n versoek aan die Onafhanklike Klagtedirektoraat (OKD) gestuur om ‘n saak, waar ses vermeende plaasaanvallers glo weens swak polisie-ondersoekwerk op Hartswater vrygelaat is, te ondersoek.

Die TLU haal in die versoek ‘n berig aan uit Beeld (13 Julie 2010) waarvolgens die verdagtes vrygelaat is. Volgens mnr. Phaladi Shuping, ‘n woordvoerder vir die Nasionale Vervolgingsgesag, is dié mans se borggeld ook aan hulle terugbetaal.

‘n Mnr. en mev. Engelbrecht was die slagoffers van ‘n ernstige plaasaanval op 10 Januarie 2010. Die TLU SA het die OKD gevra om dié voorval, asook die Polisie se ondersoek, na te gaan en as hulle vind dat ‘n onvoldoende ondersoek tot die vrylating gelei het, die skuldiges aan die pen te laat ry.

Bron:

Jacaranda FM

14 Julie 2010