Plaasmoord 'lae intensiteit oorlog'

Plaasmoorde neem nou epidemiese afmetings aan, met boere wat hulleself in ‘n lae intensiteit oorlog bevind eerder as net in enkele misdaadvoorvalle, sê die Vryheidsfront Plus (VF Plus).

Luidens ‘n verklaring sê adv. Anton Alberts, die party se ekonomiese parlementêre woordvoerder, heers daar skok in die party se geledere oor die twee plaasmoorde wat die afgelope naweek in Limpopo plaasgevind het.

Alberts meen die kombinasie van die terreur van plaasmoorde en verhoogde krag- en brandstofpryse is ‘n doodsteek vir die boerderybedryf asook voedselsekuriteit in die land. “Indien mens boonop die abortiewe grondeiseproses daarby voeg, dan is dit duidelik dat boere in Suid-Afrika uiters dapper mense is deur steeds te probeer voort boer.”

Onthou om landbou.com se petisie – Stop plaasmoorde – te onderteken.

Terugkeer van die kommandostelsel
Alberts sê die boeregemeenskap is reg om ernstig te vra vir die terugbring van die kommandostelsel.

“Die boere is tans uitgelewer aan geweld en doodslag met net ‘n patetiese Suid-Afrikaanse Polisiediens (SAPD) en ‘n paar uitgedunde wapens waarmee hulle hulleself moet beskerm. Die Regering sal ernstig moet begin besin oor die stand van sake en oor die terugbring van die kommandostelsel,” verduidelik hy.

Volgens Alberts was die stelsel nooit rasgedrewe nie, en moet geen geskiedkundige, rasse of praktiese beletsel op die stelsel bestaan nie.

Die party is van plan om binnekort met pres. Jacob Zuma oor die saak te gesels. “Dit is belangrik dat die staat almal in Suid-Afrika se lewens kan beveilig, maar veral dié van die boere wat die sosio-ekonomiese ruggraat van ons samelewing daarstel by wyse van voedselsekuriteit,” meen Alberts.

Lees ook:

Politieke party vaar uit oor plaasmoorde

3 Maart 2010