Plaaswerker-kompetisie bars uit nate

Altesame 112 nominasies van 34 plase is vir vanjaar se Hexrivier Tafeldruif-assosiasie se Plaaswerker van die Jaar-kompetisie oorweeg. Dié kompetisie het merkwaardig gegroei as in ag geneem word dat slegs 43 nominasies van agt plase verlede jaar daarvoor ingeskryf is.

Vanjaar se senior kategorie is deur mnr. André Thops, plaasbestuurder by die Robey-boerdery van mnr. Fanie Schwartz, verower.

In die middelbestuur-kategorie is mnr. Kobus van der Horst as wenner aangewys. Hy is in diens van mnr. Poen Jordaan van Mountain Lodge, in die Hexvallei. Die wenner in die kategorie vir administratiewe personeel is mev. Deidré Malgas, ook van Mountain Lodge-boerdery. In die kategorie vir junior bestuur was mnr. André Plaatjies van dieselfde boerdery die wenner.

Mnr. Emile Asplein van De Vlei-boerdery van mnr. Leon Viljoen is aangewys as die wenner in die kategorie vir algemene plaaswerkers.