Plase: Herrie oor ‘nasionalisering’ geblus

‘n Herrie oor die nasionalisering van plase in Suid-Afrika, wat die naweek in die media ontstaan het, is nie op die kaarte nie, sê Agri SA.

Mnr. Thozi Gwanya, die direkteur-generaal van die Departement van Grondhervorming en Landelike Ontwikkeling, het aan Agri SA gesê dat die nasionalisering van produktiewe landbougrond ‘’nie op die kaarte is nie”.

Volgens dr. Theo de Jager, ondervoorsitter van Agri SA, het Gwanya Maandag tydens ‘n vergadering aan hom gesê dat die staat nie beplan om landbougrond te nasionaliseer nie.

Volgens verskeie mediaberigte het Gwanya in die departement se driejaar strategiese plan ‘n voorstel gedoen wat aandui dat die land se produktiewe grond ‘n nasionale bate moet word.

Luidens ‘n berig in The Citizen wil Gwanya die Grondwet glo verander sodat hy produktiewe plaasgrond na ‘n nasionale bate mag verander.

Slegs onproduktiewe plase teruggeneem
De Jager sê volgens Gwanya is die departement slegs van plan om plase, wat deur middel van grondeise aan begunstigdes gegee is en onproduktief is, terug te neem. “Vir dit wat hy wil doen is dit nie nodig om die Grondwet te verander nie”, sê De Jager.

Hy sê uit dit wat na bewering in die verslag staan, kan egter afgelei word dat nasionalisering van produktiewe grond geïmpliseer word.

De Jager sê Agri SA was vandag van plan om ‘n duidelike streep in die sand oor dié kwessie te trek, aangesien dit “nie die eerste keer is wat hy (Gwanya) dié vlieër in die lug opstuur nie”.

De Jager sê hulle het ook samewerking tussen die departement en boere, ten opsigte van die besteding van 25% van die departement se begroting op die heropbou van vervalle plase, bespreek. “Dit was eintlik ‘n goeie vergadering”, sê De Jager.

Bron:

The Citizen

15 Maart 2010