Probleme vir graanboere weens produksiekontrakte

Graan SA het boere weer gewaarsku dat produksiekontrakte wat deur sommige kopers en handelaars in die mark aangebied word, ernstige probleme vir graanboere ingevolge die BTW-wet kan skep.

Dié waarskuwing volg op 'n gesprek van Agri SA en Graan SA met die Nasionale Tesourie oor die implikasies van sulke produksiekontrakte en 'n vorige waarskuwing van Agri SA.

Mnr. Bully Botma, voorsitter van Graan SA, sê sekere kontrakte wat graanboere as kontrakteurs in die produksieproses sluit, veroorsaak dat die BTW-status van dié boere en hul ondernemings in die gedrang kom en selfs kan verval.

"In sulke gevalle kan hierdie kontrakte ernstige gevolge vir boere inhou. Omdat die dieselkorting deur die BTW-stelsel geadministreer word, kan dit ook die registrasie van graanboere om vir die dieselkorting in aanmerking te kom, in gevaar stel."

Mnr. Botma sê hierdie praktyk is onaanvaarbaar en het gewaarsku dat dit die dieselkorting wat die landbou ontvang, in gevaar kan stel. Volgens hom het Graan SA se kongres reeds by meer as een geleentheid sedert die herinstelling van die dieselkorting in 2001 hom daartoe verbind om geen praktyk toe te laat wat die dieselkorting in gevaar kan stel nie.

Boere word ernstig aangeraai om hulself deeglik te vergewis dat enige produksiekontrak eers vooraf deur die SA Inkomstediens goedgekeur is, voor hulle hulleself daartoe verbind. Mnr. Botma het graankopers en -handelaars se samewerking gevra.

Mnr. Johan Pienaar, direkteur van ekonomie en handel by Agri SA, het gesê die probleem hou verband met die definisie van 'n ondernemer in die BTW-wet. Dit bepaal onder meer dat die ondernemer moet lewer of verkoop. As 'n boer bloot as 'n kontrakteur sou optree, sal sy BTW-status in gedrang kom.