Purchase moet LBK in nuwe era lei

Dr. John Purchase, hoofbestuurder van Graan SA wat op 1 September die nuwe uitvoerende direkteur van die Landboubesigheidskamer (LBK) word, is 'n goeie kandidaat om die LBK in 'n nuw era in te lei.

Só sê sy voorganger, dr. Tobias Doyer, wat hom by Absa aansluit om banksake met die vervaardigingsbedryf, waarvan landbouprosessering 'n belangrike komponent vorm, te bevorder. Doyer sê Purchase is 'n uitstekende kandidaat wat goed in die landbou geposisioneer is, hy is in aanraking met talle mense in die bedryf en het die styl en aanvoeling vir 'n nuwe era.

Hy meen die LBK sal in die toekoms sy reikwydte uitbrei om ook ander voorsieners aan die landbou in te sluit en om 'n meer volwaardige rol in die landboufamilie te speel. Dit sluit in die uitbreiding van die handel in Suider-Afrika en na-vestigingsondersteuning van nuwe boere.

Mnr. Neels Ferreira, voorsitter van Graan SA, sê hy is spyt dat Purchase Graan SA se diens ná vyf jaar verlaat. Hy het hom bedank vir sy diens aan graanboere en hom voorspoed toegewens.

Hy sê die gewone prosedure sal nou gevolg word om die posisie te vul en die pos sal geadverteer word. " 'n Man van die kaliber wat vir die pos nodig is, skop 'n mens ongelukkig nie agter elke bos uit nie. Daar is min wat oor die nodige ervaring en kennis van die graan- en oliesadebedryf beskik."

Purchase sê hy sien uit na die uitdagings en geleenthede wat die pos binne die landbou-waardeketting bied. "In 'n tydperk van globalisering is daar baie nuwe handelsgeleenthede wat waarde vir aandeelhouers kan toevoeg en landbou in die algemeen in 'n mededingende omgewing kan bevoordeel. Ek sal ook graag met die regering en ander belanghebbendes wil saamwerk ter wille van beter geleenthede vir almal," het hy gesê.

Purchase was sedert 2002 in die bestuurspan van Graan SA. Hy het in Julie 2005 hoofbestuurder geword. Hy het ook wye navorsingservaring by die Landbounavorsingsraad se Kleingraaninstituut in Bethlehem opgedoen waar hy sedert 1981 gewerk het.

Landbouweekblad, 27 Julie 2007