Rampe en nood: Tina wil wikkel

Beoogde aksies rakende ramp- en noodondersteuning aan die landbou moet dringend aan haar verskaf word, het die Minister van Landbou pas aan ‘n afvaardiging van Agri SA gesê.

Tydens ‘n vergadering wat ‘n afvaardiging van Agri SA met me. Tina Joemat-Pettersson, Minister van Landbou, Bosbou en Visserye, gehou het, het sy daarop aangedring om aktuele aangeleenthede in die landbou spoedeisend te hanteer.

Sy het Agri SA versoek om tersaaklike dokumentasie in hierdie verband en spesifieke met betrekking tot aksies rakende ramp- en noodondersteuning aan die landbou dringend aan haar te besorg.

Luidens ‘n nuusverklaring het Joemat-Pettersson die afvaardiging ingelig oor pres. Jacob Zuma se stappe wat gerig is op verbeterde dienslewering, gemeet aan teikens van die medium termyn strategiese raamwerk van die regering asook aan die ANC se Polokwane-resolusies. “Ek gaan ook hieraan gemeet word en gaan dienooreenkomstige dienslewering van my amptenare verwag”, het sy gesê.

Agri SA se afvaardiging, onder leiding van mnr. Johannes Möller, voorsiter, het die geleentheid benut om die voorkeure van sy werksprogram vir 2010 met haar te bespreek. Heelwat aandag is gewy aan die Strategiese Plan vir die Suid-Afrikaanse Landbou as raamwerk vir beleidvoering. Daar is ‘n verstandhouding bereik dat die jongste beleidinisiatiewe van die Regering in hierdie plan verreken en op die hoogste vlak bevestig moet word.

Die betrokkenheid van die minister en van haar kollegas by Agri SA se bedryfskonferensie op 25 Februarie, die boerontwikkelingskonferensie op 26 Februarie en die veiligheidsberaad op 8 Maart is ook met haar bespreek en sy het haar samewerking en ondersteuning daaraan gegee.

25 Januarie 2010