Ramphulp vir Vrystaters

Boere van die Noordoos-Vrystaat gaan ramphulp van R11,4 miljoen ontvang vir die skade wat hulle gely het toe duisende stuks vee in September van koue gevrek het. Die geld word van 16 Februarie af aan byna 1 500 aansoekers in die Vrystaat uitbetaal.

Boere wat skade gely het, sal net vir tien koei-eenhede vergoed word. Die eerste vyf eenhede word 100 % uitbetaal en die volgende vyf 80 %. 'n Koei-eenheid is R2 000 werd, wat beteken dat elke suksesvolle aansoeker 'n maksimum van R18 000 sal ontvang, sê me. Christa Klinck, ontwikkelingskundige van die Vrystaatse departement van landbou wat die hulpskema hanteer.

Volgens die skaal waarop dit bereken word, is 'n koei een koei-eenheid, 'n bul 1,8 koei-eenhede, 'n lam 0,1 en 'n ram 0,35 eenhede. Elkeen se skade word bymekaar getel, na koei-eenhede verreken en die eerste tien dan uitbetaal.

Inligting oor die hulp is aan Vrystaat Landbou, die National Farmers' Union en raadslede en munisipaliteite in die betrokke distrikte gestuur.

Boere en vee-eienaars wie se aansoeke geslaag het, moet hul tjeks by die departement se kantore in Heilbron, Frankfort, Villiers, Cornelia, Vrede, Warden, Harrismith, Memel, Tweeling, Reitz, Bethlehem en Kestell gaan haal.

Mnr. Cassie Muller, ondervoorsitter van Vrystaat Landbou, sê kommersiële boere is dankbaar vir dié hulp, hoewel dit lank geneem het. Die Oos-Vrystaat is nog erg in 'n droogtegreep, maar die huidige hulp en die nasionale strategie wat nou in werking is, bring hoop dat droogtehulp vinniger toegeken sal word.