Reën kan waterkrisis veroorsaak

Kundiges meen die groot hoeveelhede reën wat die afgelope twee weke oor groot dele van die land geval het kan ‘n grootskaalse waterkrisis veroorsaak.

Me. Mariette Liefferink, uitvoerende hoof van die Federasie vir ‘n Volhoubare Omgewing, sê suurwater vanuit die Witwatersrand se westelike myngebied stroom die Limpoporivier- en Vaalrivier-opvangsgebiede in weens die reën. Sy sê dit loop dus in die Tweelopiespruit, die Krokodilrivier en Wonderfonteinspruit in.

Volgens Liefferink kan dié suurwater riviere besoedel en in Potchefstroom en dele van Gauteng se drinkwater beland as dit nie spoedig behandel word nie. Sy sê sy het wel inligting ontvang dat die Regering R2 miljoen bewillig het om die water tydelik te behandel, maar ‘n langtermynplan is broodnodig.

“Dit is betreurenswaardig dat dit eers op ‘n krisis moes uitloop vir die Regering om hierop te reageer. Hulle weet al van 1996 af van die probleem!”

Regstappe op die horison
Liefferink sê hulle het die Regering tot aan die einde van vandag tyd gegee om ‘n gedetailleerde langtermynplan vir die behandeling van die water aan hulle voor te lê, andersins sal hulle in samewerking met die Legal Resource Centre regstappe neem.

“Ons wil ‘n gedetailleerde strategie vir die behandeling van die water en riviere sien. Die plan moet ook verduidelik hoe verbruikers in opvangsgebiede onder die kom vergoed gaan word en hoe die omgewing herstel gaan word!

“Die situasie is baie, baie ernstig en kan ‘n groter krisis veroorsaak as wat mens dink!” Liefferink meen die hantering van dié kwessie gaan ‘n presedent skep vir die hantering van suurwater uit die sentrale en oostelike dele van die land. “Ons verwag dat suurwater uit dié dele binne twee jaar gaan oorspoel wat ondenkbare gevolge kan hê”. Volgens Liefferink is suurwater wêreldwyd die tweede grootste krisis naas klimaatsverandering.

Hulp aan Vrystaat-boere
Intussen hoop Vrystaat Landbou dat probleme weens oorstromings in dié provinsie binnekort in alle erns aangespreek sal word. Mnr. Henk Vermeulen, hoofbestuurder, sê hy het vandag in kontak getree met die Premier se kantoor, asook die provinsiale Departement van Landbou en ramp- en noodhulpsentrums.

Groot dele van die provinsie het vandeesweek onder oorstromings deurgeloop, veral in die noorde en ooste. “Ons is steeds bekommerd oor die Vaalrivier se vlakke wat nie daal nie, veral met die dam se sluise wat oop is.

Daar is nog ‘n gebied wat bygekom het; ons het vanoggend gehoor die pad tussen Wesselsbron en Bultfontein moes weens die reën gesluit word”. Vermeulen sê in die meeste gebiede skyn die son egter en word opnames van die skade gedoen.

29 Januarie 2010