Regering wil SA boere in Afrika bystaan

Ooreenkomste vir die vestiging van Suid-Afrikaanse boere in Zambië, Suid-Soedan, Angola en die Demokratiese Republiek van die Kongo, word deur die Regering oorweeg.

Me. Tina Joemat-Petersson, Minister van Landou, Bosbou en Visserye, het bevestig dat die Regering besig is met sulke ooreenkomste.

Sy het by Agri SA se jaarkongres by Muldersdrift gesê Suid-Afrika wil nie sy kommersiële boere wegjaag nie, maar wil hê dat hulle hul boerderybelange na ander lande in Arika moet uitbrei.

“Ons gaan beslis 30% van die landbougrond binne die volgende vyf jaar aan swart boere oordra en daar gaan ’n tekort aan landbougrond ontstaan, daarom wil ons die geleentheid skep vir boere om hulle belange uit te brei.” Dit geld nie net wit boere nie, maar ook swart kommersiële boere.

Sy sê die Regering sal egter eers sorg dat daar behoorlike ooreenkomste tussen die lande bestaan.

Die kontrakte moet nie tussen departement of regerings wees nie, maar staatskontrakte wees wat die goedkeuring van internasionale howe geniet.

Haar departement werk saam met Agri SA om behoorlike stelsels gevestig te kry. Agri SA het by sy kongres ’n beleid oor die vestiging van boere in ander lande aanvaar.

9 Oktober 2009