Rekord vir Nederburg-veiling

Een van die gesogste versamelaarsitems op vanjaar se Nederburg-veiling is drie stelle van 30 bottels elk Veiling Cabernet Sauvignon wat elke oesjaar van 1971 tot 2000 verteenwoordig — gemaak deur die drie wynmakers van dié epog, mnre. Günter Brözel, Newald Marais en Razvan Macici.

Die 30ste Nederburg-veiling in die Paarl op 2 en 3 April bied vanjaar 'n rekordgetal van 102 deelnemers en 'n versameling van 9 290 kiste bestaande uit 178 puik en skaars wyne.

Die 11 nuwelinge is Annandale, Asara, Darling-kelders, De Toren Private Kelder, Durbanville Hills, Hidden Valley, Kleine Zalze, Nitida, Onderkloof, Stellenbosch Vineyards en Tukulu.

Mnr. Bennie Howard, veilingsbestuurder, sê dié versameling wyn vier 'n mylpaal in die Suid-Afrikaanse wynbedryf. "Ons deelnemers het hulself oortref in hul toegewydheid om merkwaardige wyne voor te lê."

Altesame 123 rooi, 29 wit, 4 vonkel, 8 Edel Laatoes, 1 Spesiale Laatoes, 10 port en 3 muskadelwyne sal te koop aangebied word.

Van die rooi wyne is 36 Cabernet Sauvignon, 17 Pinotage, 16 Shiraz/Syrah, 9 Merlot, 1 Malbec, 1 Cabernet Franc, 1 Touriga Naçional, asook 'n rekordgetal van 42 versnitwyne.

Die wit wyne sluit 10 Chardonnay, 8 Chenin Blanc, 7 Sauvignon Blanc, 3 Semillon en 1 wit versnitwyn in.
In die afdeling vir bottelgegiste vonkelwyne sal die Pongrácz MCC 1992 verkoop word.

Suid-Afrika se eie kultivar Pinotage presteer gewoonlik goed op die Nederburg-veiling. Verlede jaar het die Lanzerac Pinotage 1968 vir R7 000 vir 'n enkel 6 x 750 ml kis verkoop — die hoogste prys vir 'n rooi wyn. Vanjaar is wyn van die 1964-oesjaar te koop. Die veiling begin met die 1999-wenners van die Pinotage-vereniging se Absa Top Tien-kompetisie.

19 Maart 2004