Rekordprys vir bul

Die hoogste prys van R180 000 ('n allemintige Suid-Afrikaanse rekord) is op die twaalfde produksieveiling van Arcadia-Bonsmaras van Arthur de Villiers en Seun vir die beproefde bul AG98-338 betaal.

Die koper is mnr. Hennie Bezuidenhoudt van Benchmark-Bonsmaras, naby Excelsior.

Mnr. Hendrik Steyn, besturende direkteur van Benchmark, sê hulle het dié bul van 6 jaar oud om verskeie redes gekoop. Hy het uitstekende teelwaardes en kom uit 'n besonder goeie moederlyn. Sy ma is op twaalf jaar steeds 'n produktiewe koei in die Arcadia-stoetery. Die bul is voorts funksioneel doeltreffend gevorm, veral met besonderse bespiering en sy kalwers openbaar sy sterk erfdwang.

Steyn sê hulle gaan 338 heelwat in hul kudde gebruik, maar sy semen sal ook aan ander telers beskikbaar gestel word. Semen van dié bul is al op Benchmark-koeie gebruik en sy eerste kalwers in dié kudde behoort in November gebore te word.

Vroulike diere dragtig met sy semen gaan op 22 September op Benchmark se produksieveiling te koop aangebied word, sê Steyn.

Die naashoogste prys op Arcadia se produksieveiling was R100 000 en is betaal vir 'n seun van AG98-338 deur mnr. Paul Maree van Viljoenskroon. Mnr. Edward Hansen van Okahandja, Namibië, het die derde hoogste prys van R82 000 betaal.

Die aanbod van 60 bulle is vir 'n gemiddelde prys van ongeveer R32 000 stuk verkoop. Die kopers wat die meeste (sewe) bulle gekoop het, is mnre. Jerrie en Johan van Rooyen van Grootvlei. Altesame 51 van die bulle (85 %) is verkoop aan vorige klante van Arcadia-Bonsmaras.

Die vroulike diere is almal verkoop met die gemiddelde prys van stoetkoeie en verse R7 500 stuk, en dié van kommersiële koeie en verse R6 000 stuk.

Die duurste groep verse is verkoop vir R10 000 stuk. Die grootste koper van vroulike diere was mnr. Gerhard Erasmus van Derby. Die afslaer was mnr. Mike Killassy.

7 Mei 2004