Renostereienaars beveg self stroping

Met vanjaar se renostervrektes wat vir die eerste 44 dae reeds op 45 staan, het private eienaars van dié diere ’n teenstropingeenheid begin.

Luidens ’n berig op News24.com het die Vereniging vir Private Renostereienaars in Limpopo besluit om self ’n plan teen stroping te maak.

Die organisasie lei tans vrywilligers en wildbewaarders op om in ’n wye verskeidenheid situasies te kan optree. Die eenheid sal glo volgens ’n skedule werk, met ’n sekere aantal vrywilligers wat elke nag diens doen.

Beloning
Luidens nóg ’n berig op News24.com het die Polisie in Limpopo ’n beloning van R500 000 uitgeloof vir enigiemand wat inligting kan verskaf wat sal lei tot die inhegtenisname van renosterstropers of mense wat planne het om renosters te stroop.

“Ons het die samewerking van elke landsburger in die provinsie en die land nodig om die misdadigers vas te trek en die slagting stop te sit,” aldus lt.gen. Simon Mpende, Limpopo se provinsiale polisiekommissaris.

Mpende sê die Polisie kan nie dié oorlog alleen wen nie, en het die hulp van die publiek nodig.

Die provinsie het verlede jaar altesame 74 renosters weens stroping verloor. In Januarie vanjaar is ten minste 10 van dié diere reeds in Limpopo doodgemaak.

Bronne: News24.com

13 Februarie 2012