Reuse-potensiaal vir pluimvee

Afrika is ’n groot gebied wat reuse-potensiaal vir die pluimveebedryf inhou, sê die Suid-Afrikaanse Pluimvee-vereniging (SAPA).

Mnr. Kevin Lovell, uitvoerende hoof van SAPA, sê volgens die jongste statistiek sal die vasteland se groeikoers teen 2020 na verwagting $2,6 triljoen beloop, met ’n tekort van meer as 23 miljoen ton hoendervleis en sowat 12 miljoen ton eiers wat voorspel word.

Afrika se totale verbruik van hoendervleis sal teen 2050 na verwagting 29 698 miljoen ton beloop, terwyl 16 487 miljoen ton eiers verbruik kan word.

Groeiende bevolking
Lovell sê volgens die data gaan Afrika se bevolking ook aansienlik groei, en die meeste van die mense sal in stedelike gebiede woon. Die grootste bevolkingsgroei word vir Oos-Afrika voorspel. Verlede jaar het dié bevolking op sowat 300 miljoen gestaan, wat teen 2050 na verwagting tot 711 miljoen kan groei.

Die hoendervleistekort in die gebied kan na verwagting 9,7 miljoen ton beloop.

Lovell sê Noord-Afrika bied ook baie geleenthede vir groei, met ’n bevolking wat met 109% kan groei en ’n tekort van 4, 9 miljoen ton hoendervleis wat teen 2050 kan ontstaan.

Suid-Afrikaanse bedryf moet groei   
Volgens Lovell sal Suid-Afrika teen 2050 in sy eie vraag na pluimveeprodukte kan voorsien, mits die bedryf oor die volgende 40 jaar met 80% groei. Groot geleenthede bestaan dus ook op die plaaslike mark.

Lovell sê die bedryf se jaarlikse inkomste word tans op sowat R50 miljoen bereken, wat uitwerk op pluimveeprodukte van sowat R1000 per verbruiker. Die land is die grootste produsent van pluimveeprodukte op die vasteland, met sowat 28% van die produkte wat plaaslik geproduseer word.

Tans staan die internasionale verbruik van varkvleis op sowat 40%, maar dit begin daal. Die internasionale verbruik van hoendervleis staan tans op sowat 34%, maar dit is besig om toe te neem. Lovell sê die groei word aan dieetkeuses toegeskryf.

2 Junie 2011