Ryp knou groente, aartappels

Aartappels. Foto: ALANI JANEKE

Die erge ryp wat sowat vier weke gelede in Limpopo voorgekom het, het gelei tot ‘n produksieverlies van 17,3% in dié provinsie, sê Aartappels SA.

Mnr. Johan Holtzhausen van dié organisasie sê ‘n produksieverlies van 10,3% is in die Loskopvallei-produksiegebied aangeteken, terwyl die Limpopo se verlies 7% is.

“Dit is meer as die verlies wat ondervind is ná die erge ryp wat in 2007 in dié streke voorgekom het,” sê Holtzhausen.

Kon erger gewees het
Volgens Holtzhausen het die swaar reëns wat in Februarie en Maart vanjaar voorgekom het, in boere se guns getel. “Die verlies kon groter gewees het as die boere op tyd geplant het. Weens die reën kon hulle nie so baie soos gewoonlik in April plant nie. ‘n Groot deel is eers later geplant, en dít het nie skade gely nie.”

Holtzhausen verwag nie aartappeltekorte in die mark nie. “Sowat 5 000 ha is vanjaar ekstra aangeplant, so ek verwag nie ernstige tekorte nie. Ons voorsien ook nie dat die pryse van 10kg sakkies die R50 merk gaan haal nie.”

Opswaai in groentepryse
Intussen berig Meat Trade News Daily aansienlike verhogings in groentepryse kan voorlê. Luidens die berig is groenteprodusente in Limpopo en KwaZulu-Natal ook hard geslaan deur ryp. Groenteprodusente in die Wes-Kaap is gelukkig gespaar.

“Die prysverhoging gaan aansienlik wees. Die tekorte sal dalk eers oor twee maande sigbaar word. Ons verwag pryse gaan in September vanjaar hemelhoog wees, want daar is nie genoeg tyd om ander gewasse aan te plant nie,” sê mnr. Johan de Bruin, verkoopsagent vir RSA Markagente. Heraanplantings kan moontlik eers oor ses weke begin.

Tamaties kos reeds R100 per boks, en groenbone – wat gewoonlik tot R7/kg is – kos byna R50/kg.

De Bruin sê die skade wat boere gely het kan moontlik tot afleggings op plase lei.

Groot skade aan suikerplantasies
Mnr. Fanie Horn, verskaffingsbeampte van die Noordberg-meule in KwaZulu-Natal, sê suikerrietprodusente in die New Hanover-, Wartburg- en Dalton-omgewing is hard deur die ryp geslaan. “Tans lyk dit of sowat 124 000 ton se suikerriet geraak is, en die skade wissel tussen eerste- tot vyfdegraads. Dit kan selfs meer word as nog ’n koue front voorkom.”

Die suikerriet moet nou so vinnig moontlik geoes word aangesien die gehalte daarvan vinnig agteruit kan gaan.

Lees ook:

Nog koue kom vir hele land

13 Julie 2010