Sakeplan kom vir grond

Grondhervorming in Suid-Afrika moet slaag, anders kan 'n Zimbabwe-styl van grondhervorming elke Suid-Afrikaner se toekoms vernietig, het mnr. Louw Steytler, voorsitter van Vrystaat Landbou (VL), op die organisasie se kongres gesê.

Om 30 % van die kommersiële landbougrond in die Vrystaat teen 2015 aan opkomende boere oor te dra, sal beteken dat 3,15 miljoen ha — 234 000 ha/jaar oorgedra moet word. Dit sal R117 miljoen per jaar teen R500/ha kos, terwyl net R26 miljoen per jaar beskikbaar is.

Dit is 'n mite dat grondhervorming 'n provinsiale landbouprobleem is. Dit is 'n nasionale uitdaging. Van die grootste probleme is te min vordering, stadige vestiging van boere met die hulp van die Regering se program vir hervestiging en ontwikkeling in die landbou en 'n gebrek aan kundigheid.

Dit is waarom 'n VL-span onder leiding van mnr. Dirk van Rensburg 'n sakeplan gaan opstel om grondhervorming te laat slaag.

"Ons het die kans om 'n eie toekoms op ekonomiese beginsels te bou. As ons faal, sal die volgende geslag ons daarvoor verantwoordelik hou."