Die Suider-Afrikaanse Ontwikkelingsgemeenskap (SAOG) verloor aansien weens sy onmag om op te tree teen die Zimbabwiese regering se miskenning van die SAOG-tribunaal, sê die TLU SA Noord.

Die tribunaal in Windhoek het bykans ’n jaar gelede bevind dat die Zimbabwiese regering verskeie bepalinge van die SAOG-verdrag geskend het deur nie wit boere in dié land se eiendomsreg te erken nie. Die tribunaal het opdrag gegee dat die Zimbabwiese regering maatreëls instel om grondeienaars in dié land se regte te beskerm en voor 30 Junie vanjaar regverdige vergoeding te betaal vir grond wat afgevat is.

Zimbabwe het die tribunaal se opdragte geïgnoreer. Suid-Afrika is die onbetwiste leier in Suider-Afrika en moet nou “in belang van die streek” soos ’n leier optree deur ingevolge die verdrag sanksies teen Zimbabwe in te stel, sê die TLU SA Noord in ’n brief aan pres. Jacob Zuma.

“Dit is in die belang van die SAOG dat die verdrag se bepalinge gerespekteer en afgedwing word. Die Suid-Afrikaanse Regering moet die voorbeeld stel deur toe te sien dat besluite van die tribunaal uitgevoer word,” sê die organisasie.

12 Augustus 2009