Senwes-vergadering verloop glad

Senwes se jaarvergadering het goed afgeloop en daar het niks gekom van die aanslag van Landboulex om die direksie uit te stem en met ander direksielede te vervang nie. Dié aanslag sal op 'n buitengewone vergadering op 1 November gemaak word.

Mnre. Japie Grobler en Danie Minnaar is onderskeidelik eenparig as voorsitter en ondervoorsitter van die direksie herkies.

Mnr. Grobler het op die vergadering gesê die direksie wat in 2000 verkies is, het in sy eerste twee jaar daarin geslaag om regstellings in werking te stel en omdraai-aksies suksesvol aan te pak. "Die uitdaging is nou om Senwes se aandeelhouerswaarde te herstel en die besigheid tot sy volle potensiaal te ontwikkel."

Hy het lede versoek om die omdraai-aksies te steun "en hulle nie te laat intimideer deur waninligting van mense en instansies met ander agendas nie".

Senwes se finansiële state is ook aan die vergadering voorgehou en goedgekeur.

Landboulex het nie sy aksie teen Senwes op die jaarvergadering gebring nie, maar het gevra dat 'n buitengewone vergadering van Senwesbel gehou word. Dié vergadering word op 1 November op Klerksdorp gehou. Ingevolge die Maatskappywet kan 'n buitengewone vergadering met 'n bepaalde doel aangevra word as minstens 100 lede dit versoek.

In die versoek om die buitengewone vergadering het Landboulex sy voorneme te kenne gegee dat daar op dié vergadering gepoog gaan word om almal behalwe een van die dienende direksielede van Senwesbel te vervang met vyf lede wat deur Landboulex voorgestel is. Die sittende direkteure wat voor die verstryking van hul ampstermyn ingevolge Landboulex se versoek vervang moet word, is mnre. Japie Grobler, Danie Minnaar, Jannie Els, Thys Lourens, Kit Thompson en Willie Wigget. Die nuwe direkteure wat Landboulex voorstel, is drr. Philip du Toit en Theo Alant en mnre. Abraham Bouwer, Alan Jordaan en George Fivaz.

16 Oktober