Senwes vier beste jaar nóg

Senwes vier vanjaar sy honderdste bestaansjaar en het in die jaar tot 30 April sy mees winsgewende jaar nog beleef. Wins na belasting het met sowat 110% gestyg tot R368 miljoen terwyl verdienste per aandeel met sowat 112% verbeter het tot 203 sent.

“Die afgelope jaar se gunstige landbouseisoen het ‘n gesonde basis geskep vir dié resultaat. Dit het momentum verskaf sodat ‘n stewige prestasie gelewer kon word deur beide insetverskaffing en marktoegang, met sterk ondersteuning deur kredietverskaffing. Vanjaar is dit opnuut bewys dat Senwes se sakesukses gesetel is in sy fokus op kernbesigheid en die uitbou en versterking daarvan,” sê mnr. Johan Dique, besturende direkteur.

Dié landboubesigheid is positief oor die komende finansiële jaar ondanks die wêreldwye ekonomiese krisis.  Die landbou word nie so erg soos ander sektore geraak nie en dit skep ‘n grondslag vir die verdere ontwikkeling van beter mededingendheid en diens.

“Dié uiters bevredigende resultaat is die samevloeiing van die destydse omdraaiproses, toepassing van strategie, fokus, uitbouing  van die kernbesigheid, doelgerigte leiding deur die direksie en die vlak van eienaarskap wat deur die personeel gewys is. Ons gee hiermee erkenning aan al ons voorgangers se harde werk, toewyding, insig en terselfdetyd ook aan ons huidige belanghebbendes,” sê Dique.

Senwes se voorgestelde finale dividend is 30 sent per aandeel, onderhewig aan bekragtiging deur aandeelhouers.

1 Julie 2009