Senwes vorder met bemagtiging

'n Volledige swart ekonomiese bemagtiging-beleid word vir Senwes saamgestel. Dit sal in September, met doelwitte en teikendatums, vir goedkeuring aan die direksie voorgelê word, het mnr. Johan Dique, besturende direkteur, op 'n inligtingsdag in Kroonstad gesê.

Dit volg ná die direksie in Januarie 'n strategiese besluit geneem het om die maatskappy volledig in te rig sodat dit aan die Regering se riglyne hieroor voldoen.

Die direksiebesluit is in pas met dié amptelike riglyne, wat onder meer voorskryf dat minstens 25,1 % van 'n bemagtigde maatskappy se aandele aan swart mense moet behoort. Swart mense moet in die direksie en uitvoerende bestuur dien en 'n vaste persentasie van die maatskappy se verkryging moet van swart en bemagtigde verskaffers kom.

Die onderneming moet voorts regstreeks in klein- en mediumgroot swart organisasies belê. Dit moet 'n regstreekse bydrae tot swart ekonomiese bemagtiging lewer in die omgewing waarin dit sake doen. Senwes sal aan dié vereiste voldoen deur 'n pakket van betrokkenheid, adviesdienste, inligting en fasilitering te bied aan boere wat bemagtigingprojekte op plaasvlak aanpak.

Dique het gesê dit sou onverantwoordelik teenoor aandeelhouers wees om nie aan die amptelike riglyne vir swart bemagtiging te voldoen nie. Die direksie en bestuur kan nie die maatskappy in 'n rigting laat wat binnekort in 'n onwinsgewende doodloopstraat sal eindig nie.

Hy het gewaarsku dat boere en maatskappye nie swart ekonomiese bemagtiging gering moet ag en ignoreer nie omdat dit slegs 'n breë beleid en riglyn is waaraan vrywillig voldoen kan word.

"Ons kon werklik nie vir meer gevra het nie — die kans om dit self te doen. Die Wet op Swart Ekonomiese Bemagtiging maak egter ook voorsiening vir 'n advieskomitee aan die President, wat hom oor vordering sal inlig. Dié komitee sal sekerlik wysigings aan die wet aanbeveel, asook moontlike ander ingryping as 'n bedryf se vordering nie na wens is nie."