Simbra's handhaaf getallegroei

Die volgehoue toename in Simbra-getalle oortref alle verwagtinge. Dié ras is nou die vierde grootste van 31 vleis- en dubbeldoelrasse in die land, het mnr. Llewellyn Angus, voorsitter van die Simmentaler- en Simbra-beestelersgenootskappe, in sy jaarverslag op dié genootskappe se jaarvergadering in Pretoria gesê.

Die Simbras in Suid-Afrika is maar 17 jaar oud, maar hul getalle het die afgelope vyf jaar met 16 % gestyg. Die getal stoeterye wat tot die genootskap behoort, het die in dieselfde tyd tot 446 gegroei, waarvan 312 Simmentaler- en 134 Simbra-stoeterye is.

Die getal diere in besit van lede op het op 1 Julie vanjaar 'n nuwe rekordsyfer van 60 200 bereik 38 400 Simmentaler en 21 800 Simbra. Die gemiddelde getal vroulike diere per kudde het ook 'n nuwe rekord bereik, naamlik 90 Simmentalers en 130 Simbras.

Vandag is 40 % van alle Simbra-bulle F3's en F4's, terwyl 44 % van die vroulike diere nog F1's is 'n aanduiding dat nuwe bloed voortdurend in die ras opgeneem word, sê mnr. Angus.

Ook deelname aan prestasietoetsing het vanjaar nuwe hoogtes bereik 77 % van alle Simbras en 71 % van Simmentalers neem nou deel. Omdat getalle met stamboomkoppeling 'n sleutelrol by teelwaardes speel, is dit belangrik dat telers van Suid-Afrika en Namibië in een groot kuddeboek verenig is.

Die jongste internasionale Breedplan-ontleding toon 'n hoë korrelasie met die vorige een. Die aantal gewigte wat ontleed is, het by die Simmentalers vermeerder tot 380 000 en by die Simbras tot meer as 61 000.

Prestasietoetsgeld wat 10 % goedkoper as dié van die Landbounavorsingsraad se skema is, gaan met nog 33 % verlaag word, sê mnr. Angus.

Ander hoogtepunte van die jaar was die derde wêreldkongres in Pretoria met 100 oorsese gaste van 15 lande. Die internasionale Simbra-kampioenskap van 'n paar maande gelede op Vryburg was ook die grootste Simbraskou ter wêreld, aldus mnr. Angus.