Sindikaat dalk agter veediefstal

‘n “Hoogs professionele” sindikaat is moontlik agter die veediefstal wat tans in die Durbanville- en Philadephia-gebied voorkom.

Veediefstal in dié gebied het die afgelope drie maande hand uitgeruk. Meer as 200 skape en sowat drie beeste is op plase, soos Groot Phesantekraal, Meerendal en Diemersdal, gebuit.

Produksie ly ook
By mnr. André Brink van die plaas Groot Phesantekraal is 74 skape gesteel waarvan hy 11 teruggevind het. Hy sê met die huidige prys van sowat R51 per kilogram kom dit neer op ’n verlies van bykans R1 200 tot R1 500 stuk.

By een boer is 16 ramme, sowat R5 000 stuk werd, gesteel. Daar is ook die verlies aan produksie wanneer plaaswerkers moet spoorsny in ’n poging om die verlore vee op te spoor.

Op ’n onlangse vergadering tussen die SA Polisiediens, die veediefstaleenheid op Malmesbury, die misdaad-inligtingsdiens, individue en Durbanville se landbouvereniging is bekend gemaak dat die diewe professioneel is en moderne tegnologie, soos selfone, gebruik om die misdaad te pleeg.

Die landbouvereniging se bestuur het aan sy lede gesê die misdadigers ken die gebied baie goed en beplan hul operasies noukeurig.

Lees ook: Veediefstal: Probleem in Bothaville

Groter sindikaat
Die moontlikheid bestaan ook dat hulle “op bestelling” vir ’n groter sindikaat steel.

“Hulle tree op in groepe met ongeveer ses mense wat die skape aanjaag en twee mense wat op die voorafbepaalde roetes die drade knip.” Die roetes word met merkers, soos blikkies of sakke, gemerk. Boere is gevra om nie die merkers te verwyder nie, want dit kan die kans vir inhegtenisnemings beperk.

Die polisie doen ’n beroep op boere om seker te maak skape se halsbande is in ’n werkende toestand, met gelaaide batterye en die tyd daarvan moet reg gestel wees. Indien die halsband alarm maak (gewoonlik ’n selfoonoproep na die produsent), moet die polisie se bystandsfoon by 082 469 7358 geskakel word.

Boere is gevra om nie met bakkies en ligte na die skurke te gaan soek nie. Dit sal hulle laat spaander en inhegtenisneming in die wiele ry. Daar moet versigtigheid aan die dag gelê word om nie bewyse, soos voetspore, te vernietig nie, aangesien die bewyslas in veediefstalsake moeilik is.

Lees ook: Veediefstal steeds erg in Gauteng

11 Julie 2011