Skattings van mielie-oes verskil

Daar blyk iewers 'n misverstand te wees met Suid-Afrika se mielie-oeste, want as 'n mens na die syfers kyk wat uit verskillende oorde kom, is daar óf meer óf minder mielies as wat amptelik aangedui word.

Volgens die finale skatting van die Nasionale Oesskattingskomitee (NOK) was die afgelope seisoen tot 30 April se mielie-oes 7 225 140 ton. Die SA Graaninligtingsdiens (Sagis) rapporteer egter op 28 Mei dat boere tot 30 April 7 907 845 ton mielies gelewer het. Dit is 682 705 ton meer.

In sy vierde produksieskatting vir die bemarkingsjaar tot 30 April 2003 skat die NOK die mielie-oes op 8 595 miljoen ton. Graan Suid-Afrika verwag weer 'n oes van 7 628 miljoen ton. Dit is 966 000 ton minder.

Mnr. Bully Botma, voorsitter van Graan SA, hou vol dat die oes kleiner is as wat amptelik aangegee word. Hy sê boere wat reeds gestroop het, se opbrengs is kleiner as wat verwag is, terwyl rypskade in die Wes-Vrystaat ook nie verreken is nie.

Mnr. Graham Ebedes, uitvoerende hoof van OTK, het weer gesê boere binne die bedieningsgebied van dié agribesigheid wat begin stroop het, het groter opbrengste as wat hulle verwag het.

Van die afgelope bemarkingsjaar se mielie-oes is 1 328 000 ton en 52 000 ton mielieprodukte uitgevoer, terwyl 328 000 ton ingevoer is.

Graan SA verwag dat 580 000 ton mielies vir die huidige bemarkingsjaar ingevoer sal word. Saam met die 1 240 000 ton mielies wat van die afgelope bemarkingsjaar oorgedra is, sal die totale kommersiële aanbod dus 9 448 miljoen ton beloop. Die totale kommersiële vraag, wat 'n verwagte uitvoer van 855 000 ton insluit, kan dus 8 668 ton beloop, wat aan die einde van seisoen 'n tekort van 780 000 ton sal beteken as die nodige oordrag na die volgende seisoen op 919 000 ton beraam word.