Slenkdalkoors is ‘buite beheer’

’n Groot uitbreking van Slenkdalkoors weens die reënerige toestande die afgelope tyd het reeds die lewe van ’n man in die Vrystaat geëis. Die siekte is by nog ses mense in die Vrystaat en die Noord-Kaap gediagnoseer.

Versprei vinnig
Boere, plaaswerkers en veeartse wat met besmette karkasse werk, loop die grootste risiko om die siekte op te doen. Van Rooyen sê die siekte is op 38 plase bevestig en die resultate van bloedmonsters van nog 69 plase word afgewag. Die siekte is besig om vinnige na ander distrikte van die Vrystaat te versprei.

In die Noord-Kaap word die voorkoms van slenkdalkoors onder beeste op ’n plaas by Kakamas streng dopgehou en beheer. 

Dr. Nas Coetzee, ’n staatsveearts in Bloemfontein, sê  die epidemie word vererger omdat die water in die panne nog nie opgedroog het nie en nuwe geslagte muskiete uitbroei. Hy merk ook dikwels digte swerms muskiete by panne op.

Dooie entstof op
Volgens Coetzee kan die getal vrektes meer as twee keer die amptelike vrektesyfer beloop omdat talle boere nie meer die vrektes aanmeld nie. Onderstepoort Biologiese Produkte (OBP) het intussen laat weet dat sy voorraad dooie entstof, wat veral in dragtige diere teen slenkdalkoors gebruik word, uitgeput is. Dit sal volgende maand weer beskikbaar wees.

Lees ook:

Boer ontslaan na Slenkdal-skrik

Lees meer in Landbouweekblad se uitgawe van 19 Maart 2010.

12 Maart 2010