Slenkdalkoors: Dooie entstof byna hier

Duisende uitstaande bestellings vir dooie entstof vir Slenkdalkoors wag om vervul te word, maar dié entstof sal steeds eers in Mei beskikbaar wees, sê Onderstepoort Biologiese Dienste (OBD).

Mnr. Willie Botha, bestuurder van spesiale projekte by OBD, sê die entstof wat reeds vervaardig is gaan tans deur die gehaltebeheerproses en dít is nie ‘n proses wat aangejaag kan word nie.

“Die eerste besending dooie entstof sal eers in die eerste week van Mei beskikbaar wees, en die tweede besending in Junie. Daarna sal daar elke week ‘n nuwe besending beskikbaar wees. Ons het tans duisende uitstaande bestellings, wat ons hoop om dan aan te kan voorsien,” vertel Botha.

Die OBD het tans sowat vyf miljoen eenhede lewendige entstof, maar dié entstof kan nie gebruik word vir diere wat in die eerste drie maande van dragtigheid is nie. Volgens Botha kan dit slegs aangewend word vir diere wat langer as drie maande dragtig is.

Entstof voorsien
Luidens ‘n verklaring van die Wes-Kaapse Departement van Landbou is twee gevalle van Slenkdalkoors onder diere in dié provinsie bevestig. ‘n Staatsveearts is het ook die siekte opgedoen, maar hy is reeds gesond.

Al die gevalle het in die Beaufort-Wes omgewing voorgekom. Volgens die departement het hulle reeds sowat 80 000 eenhede entstof teen die siekte kosteloos aan boere in die provinsie voorsien.

Nog ‘n sterfte
Intussen is mnr. Giel Smith, die 55-jarige pa van Juan Smith, Springbok-flank en die Cheetah-rugbyspan se kaptein, is gister op Bloemfontein begrawe nadat hy verlede week in die Universitas hospitaal oorlede is. Luidens ‘n berig van Nuus24.com is Smith weens komplikasies verwant aan Slenkdalkoors dood. Hy het buite die stad geboer.

Smith is een van sewe persone in die land wat aan Slenkdalkoors beswyk het. Volgens ‘n verklaring van die Gesondheidsdepartement het 104 persone reeds die siekte onder lede. Die siekte het in die Bultfontein distrik in die Vrystaat uitgebreek, en kom nou ook in Noordwes, die Noord-Kaap, Oos-Kaap, Gauteng en die Wes-Kaap voor.

14 April 2010