Slenkdalkoors maai in Oos-Kaap

Slenkdalkoors het na areas in die Oos-Kaap versprei waar sowat 200 ooie en 20 lammers reeds weens die siekte gevrek het.

Me. Jane Pistorius, die bestuurder van Veeartsenykunde in die westelike dele van dié provinsie, sê die diere het in die Middelburg- en Hofmeyr-distrikte gevrek.

Volgens Pistorius is die voorkoms van Slenkdalkoors reeds op twee plase bevestig, en wag hulle op toetsuitslae van diere wat op etlike ander plase getoets is.

Pistorius raai boere aan om versigtig te werk te gaan met besmette diere. Sy sê boere, wat op diere se karkasse afkom, moet nie self die karkasse oopsny nie, aangesien ‘n karkas van ‘n dier wat weens die siekte gevrek het hoogs aansteeklik kan wees. Sy meen boere moet eerder ‘n veearts kontak om die dier te dissekteer en uit te vind waarom dit gevrek het.

Volgens Pistorius verwag hulle dat die siekte verder sal verspei, aangesien baie boere nie hulle diere daarteen inge-ent het nie, asook weens die tekort aan entstof in die land.

Bevestigde gevalle onder mense
Intussen het die Gesondheidsdepartement gister bekendgemaak dat 21 gevalle van Slenkdalkoors-infeksies by mense bevestig is. Luidens ‘n verklaring sê mnr. Molefi Sefularo, die adjunk-minister van Gesondheid, tot dusver het twee mense, beide van die Vrystaat, aan dié siekte gesterf. Hy sê die menslike gevalle is gewoonlik boere, veeartse en plaaswerkers.

Hy sê geen spesifieke behandeling bestaan vir Slenkdalkoors nie, en die meeste mense wat die siekte opdoen behoort ten volle te herstel.

Die siekte kom tans onder vee in die Vrystaat, veral die Bultfontein-omgewing, die Noord-Kaap en die Oos-Kaap voor.

16 Maart 2010