Slenkdalkoors: Wes-Kaapse man sterf

‘n Man het in die Oudtshoorn-hospitaal gesterf aan Slenkdalkoors. Die 49-jarige  inwonder van die Karoo is die eerste menslike sterfte van dié siekte in die Wes-Kaap, sê die provinsie se departemente van landbou en gesondheid in ‘n gesamentlike verklaring.

Dit is nog onduidelik hoe die man besmet is en die Nasionale Instituut vir Oordraagbare Siektes ondersoek die bron van die besmetting. Volgens mnr. Theuns Botha, minister van gesondheid in die Wes-Kaap, is gesondheidswerkers in die Karoo en Boland op hul hoede vir tekens van die siekte.

Simptome sluit in koors, spier- en gewrigspyn, asook hoofpyn. Diegene wat aan rou vleis van ‘n besmette dier blootgestel is, of ongepasteuriseerde melk van ‘n besmette dier drink, staan ‘n groot kans om die siekte op te doen. Dit kan ook deur muskiete oorgedra word, maar die aanvang van winter verklein die kanse om so besmet te word.

Lees ook:

Slenkdalkoors en vleis

Alpakkas ook besmet
Twee alpakkas op ‘n plaas in Simondium naby die Paarl het ook  aan Slenkdalkoors gevrek. Volgens die provinsiale departement van landbou kan die verspreiding van die siekte na die Paarl-gebied moontlik aan die beweging van besmette diere toegeskryf word.  Die departement sê dit is egter ‘n geïsoleerde voorval.

Tot dusver is Slenkdalkoors bevestig in twee beeste noord van Beaufort-Wes, 11 skape in die Nelspoort-omgewing asook 25 skape en 45 aborsies by Murraysburg. Die siekte is ook in 200 skape en 100 aborsies in die gebiede waargeneem, maar is nog nie deur ‘n laboratorium bevestig nie.

29 April 2010