Somerre

Die nat, bedompige toestande en wisselende temperatuur oor Kersfees en net ná Nuwejaar in die Wes- en Noord-Kaap kan vrugtepak vertraag, korrels laat bars en swamskade aan veral tafeldruiwe aanrig.
Tafeldruifboere in die gebiede Oranjerivier, Bergrivier en Olifantsrivier het verlede week byeengekom om te besluit oor onthoudingstydperke wat gehaltebestuur sal vergemaklik.

Mnr. Thys van Niekerk, 'n tafeldruifboer van Die Denne-boerdery, Saron, en ondervoorsitter van die Bergrivier-tafeldruifprodusentevereniging, sê dit het oor Kersfees 31 mm daar gereën. Sy Prime-druiwe het erg gebars, veral omdat dit met temperature van tot so laag as 6 ºC gepaard gegaan het. Verlede week het dit tot 9 mm in die Bergriviergebied gereën, en 16 mm rondom Piketberg.

Hy sê navorsing toon dat die vaalvrotswam 'n blaarbenattingstydperk van minstens agt uur nodig het om 'n druiwetros te besmet. Toestande vir swambesmetting word gunstiger waar korrels bars weens groot temperatuurskommelinge en wanneer wingerdstokke te veel vog opneem as dit reën. Vaalvrot se inkubasietydperk dwing boere om ná reën tot 72 uur uur te wag om seker te maak dat daar nie enige besmetting is nie voordat hulle die pakkery hervat.

In die Olifantsriviergebied moes pakbedrywighede ook tydelik gestaak word. Mnr. J.B. Lazarus, voorsitter van die Olifantsrivierse Tafeldruifprodusentevereniging, sê die reën was 'n vreeslike terugslag.

Tafeldruifboere in die Oranjerivierstreek, waar dit van 1 mm tot 40 mm gereën het, het sowat die helfte van hul druiwe gepak. Mnr. Johan Burnett van Aggregate Investments en voorsitter van die Oranjerivier-produsentevereniging, sê hul sultana-oes — van alle tafeldruifkultivars die kwesbaarste vir reën — is nog nie gepluk nie.

Boere sê dit is nog nie moontlik om die omvang van die skade te bepaal nie.

16 Januarie 2004