Spesiale howe, wette teen veediefstal?

Meer geld, beter wetgewing en gespesialiseerde howe hê om veediefstal te bekamp, sê die Departement van Landbou, Bosbou en Visserye.

Luidens ‘n berig in Business Day het mnr. Kgabi Mogajane, die adjunkdirekteur-generaal van die departement, die Tesourie vir meer geld vir dié doel gevra.

Hy het die Parlement ingelig dat sindikate kommersiële en opkomende boere teiken en hulle vee steel teen enorme koste vir die ekonomie. “In die landelike gebiede is dit erger. Mense kom steel jou vee in die nag. Hulle laai die diere op ‘n vragmotor. Ons probeer ‘n oplossing vind, maar ons het belegging in die veebedryf nodig”.

Mnr. Thinus Erasmus, voorsitter van die nuut gestigte Gautengse Veediefstalforum, sê hy is baie opgewonde oor die verskerping van wetgewing. “Ons hoop net dit kan deurgevoer word, want baie boere is moedeloos oor veediefstal. Ek het vanoggend weer ‘n oproep van ‘n boer van Fochville gehad wat sê hulle loop so erg deur hy weet nie meer hoe hy gaan oorleef nie.”

Nuwe personeel by veediefstaleenhede
Erasmus sê hoewel veediefstal in Gauteng oor die laaste twee jaar ‘n skerp toename getoon het, het minder gevalle die afgelope maand voorgekom. “Ons dink dis weens die aanstelling van nuwe personeel by die polisie se veediefstaleenhede. Vyf nuwe lede is dié maand in Cullinan aangestel, en nege poste gaan binnekort by die Vereniging-kantoor gevul word. Die diewe is meer geneig om toe te slaan in gebiede waar hulle weet daar’s nie mense wat hulle gaan vastrek nie.”

Dr. Frans Saaijman van Agri Gauteng sê die Rooivleisprodusente-organisasie (RPO) in Gauteng is werklik ontsteld om te verneem hoe veediefstal in dié provinsie gestyg het. Dat alle rolspelers nou met mekaar moet saamwerk, is 'n gegewe. 

Saaijman skryf by die berig Veediefstal neem landwyd toe, dat ‘n ANC-raadslid hom persoonlik meegedeel het hoe hulle in hul mou lag vir die dwarstrekkery onder die boere en hoe ideaal die situasie hul agenda pas.

“Een van die groot kopsere wat die polisie het, is dat die boere nie hul vee behoorlik brandmerk nie. Dit maak identifisering en uitkenning feitlik onmoontlik. Aan die boere wat so kla: Is jou diere gemerk?” vra Saaijman.

Bron: Business Day

28 Mei 2010