Staat wil appèlleer teen Von Abo-saak

Die staat het aan die regspan van mnr. Crawford van Abo, ‘n boer van Bothaville, aangedui dat hy van plan is om aansoek te doen vir verlof om te appèlleer teen die Noord-Gautengse Hooggeregshof se jongste uitspraak in dié saak.

Die hof het verlede maand bevind dat Von Abo daarop geregtig is om skadevergoeding van die Suid-Afrikaanse Regering te eis vir sy grond wat in Zimbabwe gegryp is. Von Abo het agt jaar gelede al met regsaksie begin nadat 14 van sy plase in Zimbabwe onteien is.

Nog geen nuwe hofdatum
Volgens mnr. Willie Herbst, een van Von Abo se regsverteenwoordigers, het hulle onlangs ‘n inligtingstuk van die Regering ontvang oor hulle aansoek om verlof vir appèl. “Ons moet nou daarop reageer, en só sal die saak sy verloop neem”. Herbst sê hulle behoort voor die einde van die week op die aansoek te reageer.

Hy sê nog geen nuwe hofdatum is vasgestel nie, en die saak sal na verwagting binne die volgende ses tot agt weke weer voor die hof kom.

Mnr. Ernst Penzhorn, nog ‘n regverteenwoordiger vir Von Abo, het net ná die jongste bevinding aan Landbou.com gesê hy gaan aansoek doen vir ‘n nuwe verhoordatum om deskundiges se getuienis oor Von Abo se eis, en dít wat sy plase en besittings werd was, aan te hoor.

“Hy het een van die grootste boerderye in Zimbabwe gehad. Party was beesboerderye, ander saaiboerderye. Daar was ook tabak- en mielieboerdery, en hy het die grootste private dam in Zimbabwe op een van sy plase gehad,” het Penzhorn gesê.

9 Maart 2010