Staat wil in Waterberg prospekteer

Waterberg-biosfeer. Foto: www.waterbergbiosphere.org

Die Regering het voornemens om in ’n bewaringsgebied in die Waterberg-omgewing te prospekteer vir minerale. Volgens ’n grondeienaar val die betrokke gebied waarvoor aansoek gedoen word binne die Waterberg-natuurbewaringsgebied en die Unesco-geregistreerde Waterberg-biosfeerreservaat.

Die onlangs gestigte mynmaatskappy, African Exploration Mining and Finance Corporation (AEMFC), wat deur die staat besit word, het aansoek gedoen om vir yster, mangaan en andalusiet te prospekteer oor ’n gebied van 1 150 ha teenaan die Mokolorivier-natuurresevaat en binne die genoemde bewaringsgebiede wat in private besit is.

Die gebied grens aan die Mokolorivier wat onder groot druk is weens Eskom-ontwikkelings en ander mynbedrywighede in die sensitiewe Waterberg-omgewing. Volgens ’n kundige is die aansoek “ligsinnig” met “geen moontlikheid van ekonomiese neerslae van dié minerale in die Waterberg-sandsteen nie”.

Mnr. GP Kriel van Environmental Impact Management Services, het bevestig dat die gebied waar prospektering beoog word binne die Mokolorivier-natuurreservaat is. Kriel sê as deel van die proses is met elkeen van die betrokke eienaars kontak gemaak en die nodige dokumentasie aan hulle voorsien.

Lees ook:

Mynregte op wynplase onder loep

Mynbou in wynlande 'kortsigtig'

10 Maart 2010