Statistiek oor plaasmoorde verkeerd

Die Polisie se statistiek vir die aantal plaasmoorde en –aanvalle vir die 2008/’09-boekjaar is verkeerd, sê die Demokratiese Alliansie (DA).

Luidens ‘n berig in Beeld (16 Julie) het mnr. Nathi Mthethwa, Minister van Polisie, erken die betrokke statistiek is “per ongeluk” gedupliseer uit die Polisie se 2006/’07-boekjaar se jaarverslag.

Me. Dianne Kohler-Barnard, DA-woordvoerder vir veiligheid, het vroeër vanjaar vrae aan Mthethwa gestuur nadat die statistiek van 794 plaasaanvalle waarin 86 mense vermoor is, in albei die twee jare se verslae verskyn het.

“Die Polisie en die minister betreur die fout,” het Mthethwa in ‘n geskrewe antwoord aan Kohler Barnard gesê.

Word nie meer afsonderlik weergegee
Volgens Kohler-Barnard het sy die korrekte statistiek aangevra, maar sy is nie seker of dit aan haar gegee gaan word nie, “want om die een of ander rede word plaasmoord en -aanval-statistiek nie meer afsonderlik aangeteken nie”.

“Dit word glo by die statistiek vir moorde en gewapende rooftogte ingereken. Niemand weet hoekom dit nie meer afsonderlik aangeteken word nie. Dit lyk of dit nie vir die staat saak maak of daar minder boere is en minder kos vir die land geproduseer word nie.”

Nog vrae gestel
Kohler-Barnard sê sy het onmiddellik weer vrae aan die minister gestel aangesien die ouditeur-generaal dié verslae nagegaan en goedgekeur het. “Wie is daar wat die ouditeur-generaal se werk nagaan, en is daar ander statistiek wat ook nie korrek is nie?”

Kohler-Barnard wag nog op die antwoorde vir haar opvolgvrae.

19 Julie 2010