Sterk ko

Koöperasies is een van die belangrikste ondernemingsvorme waarop groei en ontwikkelingsdoelwitte van Suid-Afrika gegrond kan word, gevolglik is 'n koöperasietaakspan in Nedlac pas gestig.

Dr. Tobias Doyer, hoof uitvoerende beampte van die Landboubesigheidskamer (LBK), het in Pretoria gesê dié stap volg op 'n vergadering van Nedlac waar die afvaardiging van Besigheid Suid-Afrika, waarvan die LBK 'n lid is, 'n voorlegging gemaak het. Besigheid Suid-Afrika glo dat die huidige beleids- en strategiese dokumente 'n goeie grondslag vorm vir 'n lewenskragtige koöperasiebeweging in Suid-Afrika.
Volgens dr. Doyer meen Besigheid Suid-Afrika dat die wetgewing wat deur die Regering beoog word, bemagtigend eerder as voorskriftelik moet wees. Die publiek moet opgelei word om die potensiële rol en waarde van koöperasies te verstaan. Dié opleiding is gerig op die koöperasiewese en strek oor verskeie sektore en kan dus nie aan 'n enkele owerheidsinstansie (die Sektorale Onderwys- en Opleidingsowerheid) toegeken word nie, maar moet eerder die die verantwoordelikheid van die Departement van Handel en Nywerheid wees.
Voorts moet koöperasies selfvoorsienend en nie van skenkings afhanklik wees nie. Sodanige afhanklikheid sal die lewensvatbaarheid op die lang termyn van dié ondernemings benadeel.
Besigheid Suid-Afrika voer ook aan dat maatreëls deur die staat, soos voordelige belastingaanslae en regulasies, oorweeg kan word om jong koöperasies te steun. Hierdie maatreëls moet egter aan 'n streng tydsraamwerk gekoppel word om die selfstandigheid van die besighede te verseker.
Dr. Doyer het gesê die sakesektor is bereid om 'n aktiewe rol in die ontwikkeling en bevordering van koöperasies in die land te speel. 11 Julie 2003