Stroping kos renosterbedryf R1,4 miljard

Die waardevermindering van Suid-Afrika se totale renostertrop sedert die begin van verlede jaar – weens stroping – staan tans op R1,4 miljard, aldus die Private Renostereienaarsvereniging (PROA).

Mnr. Pelham Jones, voorsitter, sê regstreekse verliese in die bedryf behoort teen die einde van die jaar, “sedert die tsoenami in renosterstroping in 2007 begin het”, sowat R660 miljoen beloop.

“Die verdere uitwerking wat dit op renostereienaars het, is dat die waarde van die diere met twee derdes verminder het. Waar ’n renoster vroeër R350 000 werd was, verkoop dit tans teen sowat R120 000.”

Volgens Jones verlaat baie private eienaars tans die bedryf deur hulle renosters te verkoop, omdat hulle reken die risiko’s wat aan die diere verbonde is, is te hoog.

Neiging 
Jones meen drastiese stappe is nodig om die neiging dat renosters meer werd is as hulle dood is, te verander. Hy sê een van die maniere om dít te bewerkstellig is om die handel in renosterhoring wettig te maak. Dit beteken dat renosters aan die lewe gehou sal word sodat hul horings weer kan teruggroei.

“Verder is ’n massiewe poging nodig om mense in te lig oor renosters en die legende rondom die medisinale gebruik van renosterhoring. Én die skuldiges en sindikaatlede se name moet openbaar gemaak word, sodat hul dade aan die groot klok gehang kan word,” sê Jones.

Populasie
Wetenskaplike opnames bepaal dat die land se renosterpopulasie en hul habitat begin afneem. Jones sê dit kan regstreeks of onregstreeks aan stroping toegeskryf word.

Weens die feit dat baie private eienaars hul diere verkoop, word die mark vir Sanparke, om sy oortollige diere te verkoop, al hoe kleiner.

Sanparke moet dus na meer diere begin omsien, en dit plaas enorme finansiële druk op hom. “Sanparke se sekekerheidskoste het sedert verlede jaar van R160 miljoen per jaar tot R450 miljoen per jaar gestyg,” vertel Jones.

Nog twee diere
Intussen is nog twee diere Woensdagaand (28 September 2011) op ’n plaas naby Brits vrekgeskiet. Luidens ’n berig in Beeld (30 September 2011) het die stropers die diere vrekgeskiet terwyl mnr. Neels van Rensburg, eienaar van die plaas, besig was met voorbereidings om sy renosters van die plaas te verwyder.

Van Rensburg het die afgelope maand ses renosters weens stropery verloor, en tot dusver vanjaar het hy altesame agt diere verloor. Hy beoog glo om al sy renosters te verkoop.

Bron: Beeld

30 September 2011