Subsidies knou SA katoenbedryf

Die plaaslike katoenbedryf, net soos die ander landbousektore in Suid-Afrika, ly onder ander regerings se bystandsprogramme en subsidies wat hulle aan hul boere verleen. Dit benadeel internasionale markpryse.

Volgens mnr. Heinrich Schultz, die Nasionale Katoenprodusente-organisasie (Nakpo) se eerste uitvoerende beampte, word katoenboere ook benadeel deur die voortdurende styging in die pryse van produksiemiddele. "Hulle sal hierdie uitdagings die hoof moet bied deur katoenproduksie se winsgewendheid te verhoog.

"Dit kan gedoen word deur die nuutste tegnologie, soos geneties aangepaste katoenkultivars, te gebruik en waarde tot hul produk toe te voeg deur middel van kontrakpluis of die oprigting van hul eie pluismeule."

Hy het gesê binne hierdie vinnig veranderende omgewing moet die katoenprodusent kan staatmaak op 'n gespesialiseerde organisasie, gerugsteun deur 'n bemagtigde struktuur en sterk leierskap.

Nakpo het 'n paar voorkeursake uitgewys waarop mnr. Schultz hom gaan toespits. Dit sluit in die reklame van katoenproduksie, die verkryging van toegang tot die nuutste genetiese planttegnologie en die ontwikkeling van 'n omvattende bemarkingsdiens.

Hy moet ook alternatiewe bronne vir produksiehulpmiddele en ontwikkelingsfinansiering ondersoek.

Dit is sy taak om op die implikasies van die sektorale vasstelling vir seisoenale werkers te reageer en om katoenproduksie deur ontwikkelende boere te ondersteuning en te bevordering.

Mnr. Schultz is 'n bekende konsultant in veral die tekstielbedryf. Hy is van 1 April die eerste amptenaar wat daarvoor verantwoordelik is om na Nakpo se belange om te sien. Hy het sy B.Comm-graad aan die Universiteit van Pretoria verwerf waarna hy sy loopbaan by Eskom begin het.