Suiker: Oesskatting daal verder

Die verwagte opbrengs van verwerkte suiker vir 2010/’11 het verder gedaal tot 1,9 miljoen ton, sê die Suid-Afrikaanse Suiker Assosiasie (SASA).

Volgens SASA se jongste skatting word ‘n oes van 16 429 miljoen ton riet verwag, wat 1,964 miljoen ton verwerkte suiker sal lewer.

Mnr. Trix Trikam, uitvoerende direkteur van SASA, het in Augustus gesê ‘n oes van 2,07 miljoen ton verwerkte suiker is verwag, wat die kleinste oes in 15 jaar sou wees.

Minder uitvoer-inkomste
Me. Jayne Ferguson, ‘n woordvoerder vir Canegrowers SA, sê die daling in die oes gaan nie hoër pryse vir plaaslike verbruikers veroorsaak nie.

“Daar is steeds genoeg suiker vir die plaaslike mark. Dit lei wel daartoe dat minder suiker vir uitvoer beskikbaar is, wat sal lei tot laer uitvoerinkomste, wat ‘n verlies aan inkomste vir die bedryf en land veroorsaak.”

Produsente hard geslaan
Ferguson sê die daling kan grootliks aan klimaatstoestande en die droogte in verskeie dele van die land toegeskryf word. Sy sê streke, soos die Natalse Noordkus, se produksie het met 40% gedaal, en groot verliese met aanplantings is aangeteken.

Volgens Ferguson hou dit groot finansiële uitdagings vir produsente in. Sy sê as reën nou sou voorkom, sal dit help om die wortelstelsels van die suikerrietplantasies aan die gang te hou. “Rietprodusente sal egter steeds ‘n noodsaaklike wortel-bestuursprogram moet uitvoer. Dit behels tussen R4500 en R5000 per ha vir kunsmis, chemikalieë en arbeid,” verduidelik Ferguson. Dié program is nodig om die voortbestaan van die plante te verseker.

Groter geldelike las
Die koste verbonde aan die heraanplanting van suikerrietplantasies beloop sowat R14 000 per ha, en Ferguson sê verskeie boere, wat reeds onder druk verkeer, sal nie kan bekostig om dieselfde grootte plantasies weer te plant nie. Dít alles gaan ‘n invloed op volgende jaar se produksie ook hê.

Ferguson sê weens die laer oes het verskeie meulens ook vroeër as gewoonlik gesluit, wat beteken dat produsente geen inkomste voor April/Mei 2011 sal verdien nie. Dít beteken dat boere vir nog finasiering aansoek moet doen, en dit alles kan ‘n invloed op werksgeleenthede in die bedryf hê.

19 November 2010